Hasabergtunnlmonschdr

Mr hätt die Bueba wo des Monschdr aglockd ghet het älle ausfraga welle abr dabei isch net viel rauskomma. Bei dera Bolizei sin viele Ausländr gwä aus Sachsa zum Deil odr aus Hessa. Un die hen durchweg Probleme ghet mit dera schwäbische Sprache.
Eigndlich hätt nur ei gotziger die Bueba verschdanda, des wär dr Brahim gwä. Abr auch der hot zum Beischbiel des Wort 𝘉𝘭𝘢𝘧𝘧𝘰 net kennt. Des Monschdr wär aufm 𝘉𝘭𝘢𝘧𝘧𝘰 rumschbaziert un nur ganz manchmol ragfalla! Zum Glick wära ja unda iberall die Berge von Bäll gwä.
»Noi, aufn Buaba ischs nie gfalla, mir sin do älle ganz schnell aufd Seit ghopft.«
Do hot dr Brahim nur bled guckt: 𝘉𝘭𝘢𝘧𝘧𝘰, 𝘉𝘭𝘢𝘧𝘧𝘰?
Un grad des wär jo des Grusligschde iberhaubd gwä!

Fir die wo des Interview im Fernseh verpassd hen oders im Facebook net finda: des Monschdr hettn schmuddligs Tshirt anghet mit dr Aufschrift FLUID un rosa Leggings, isch au ziemlich fett un schwabblig gwä, dazu Ohrring un au a haufa Klunker um Hals un Arme, die Glatze han i ja scho erwähnt. Au Tattoos (a groß blau Dreieck mitm kleine inna drin) un grüne Fingrnägl an denes schdendich rumgnogt het. Gschminkte Lippa sin ja äbafalls scho erwähnt worra.
Äba erinnert mich mei Bieble noch die lange Wimpera wo halber ab scho wiedr ware, des wär grauslich gwä.
- Was war sonsch noch grauslich?
- Eigntlich nix. Des schdendiche Hochdeutsch vielleicht.

Also, älles was mr von dem Monschdr bis jetz mit Sicherheid weiß isch dasses Buaba alockt un dasses schriftdeidsch schbrichd un dass scho 15 Buaba als vermisst gelda.

Wenn i mir so die Fahndungsfoddos nach dene vermissde Buabe aguck, fällt mr auf dass die älle so um die 12 sin un lange Haare hen un faschd älle sin mehr odr wenigr blond, un des triffd genau auf unser Mäxle zu!
Mein Frau die Anne het scho welle dem Max seine Haar abschneida. Un do het mei Max gsagt:

DES LASS I NET ZU! BASS AUF! I GANG JETZ SELBER RUNTER INS TUNELL UND MACH DES MONSCHDER FERDIK!!

Genau in dem Moment wo dr Max, mei Sehnle, sei Laserwaffe abdrickt hot hätts hinta im Tunnl laut gschriea, des wär d Muddr gwä, wo ihm innem Sicherheitsabschdand gfolgt isch (dui isch ja net bewaffnet gwä), wohingega des Monschdr lautlos weggsackt isch.

Dr Udo schrieb am 20.2. 2022 um 11:35:20 Uhr über
Stuttgarter

Jetz komm i hoim un muss denna verzähla was i gseh hob. Isch ja hekschwahrscheinlich scho im Radio komma, des mit dena Schbringmeis, i denk, a ganz gfährliche Mudazion.
Denn dui bibbra scho vor Angschd bevor i was gsagt han.
Hesch gherd, sagt d Anne, mei Frau. Im Hasabergtunnl isch a Monschdr, wo kleine Buba alockd! I han de Max (des isch mei Sehnle) scho schdreng verwarnd!

A Hasabergtunnlmonschdr, wer hett des denkt.

Irgnd sone Psychologin von dr Bolizei (die hots grad needich!) machd sich iberd Buabe her wo angeblich a läbalang draumadisierd sei werra durch des Monschdr. Nix isch gwä! Außer dass des Monschdr d Wend ruff un aufm 𝘉𝘭𝘢𝘧𝘧𝘰 rumgschdiege wär. Ja des isch a Sach! Wenn epper aufm 𝘉𝘭𝘢𝘧𝘧𝘰 rumschbazierd un net rundrfälld! Wer so eppes gsäh het vergissd des sei Läba lang net, aber isch doch noch lengschd net draumadisiert deswäga! Dui solla sich nix eireda lassa!