|
In nomine Domini amen. Albertus nobilis dictus de Hakeborne omnibus imperpetuum. Ne oblivio, que noverca veritatis est, mentes fidelium ad lites concitet et iniurias inducat, opportunum est, ut facta hominum per testimonium et scripti seriem ad memoriam revocentur. Hinc est quod universis Christi fidelibus, quibus presens scriptum exhybitum fuerit, cupimus notum esse, quod Lutherus et Henningus fratres dicti Rachen mansum unum cum omnibus pertinenciis suis situm in campo Ascharie, quem de manu nostra tytulo tenuerunt feodali, nobis libere resignarunt et nos cum consensu dilectorum patruelium nostrorum, videlicet Alberti et fratrum suorum, necnon sororum suarum ac omnium coheredum nostrorum predictum mansum donavimus ecclesie in Meringen pro remedio animarum nostrarum nec non animarum progenitorum nostrorum iure proprietatis perpetuo libere possidendum. Ut igitur hec donatio inviolabilis et inconvulsa perpetuo perseveret, presentem paginam super hoc confectam dedimus sigillorum nostri nec non predicti patruelis nostri munimine roborandam. Testes sunt: dominus Volradus nobilis de Valkenstein, Bethmannus de Hoyme, Johannes dictus Butterberch, Bruno de Heiligental milites, nec non ceteri fide digni. Datum anno Domini mo.ccco. quinto, in festo sancti Laurencii martiris gloriosi.
|
