|
Dän snagt we môl pladd: so würde ik dat sägn. Öberall snagt se anners: hier sächt se 'ik', un dor sächt se 'eck'.
Klaus Groth häd schöne Gedichte schräbn, mud ik sägn! Uk üm de Schrîfwîse häd he sik kümmert un is to goen Ergebnissn kôm (he nich alleene).
In de Hansetîd wüte nich bloß pladd snagt: de Kooplüe häbt pladdütsch schräbn un uk am Gericht wör dat de Amtssprôke.
Na, dat kann' alns nôläsn, so genau weed ik dat uk nich.
Snagn do ik eenich gornich so geern. Ik häb hier keen, mid dän ik pladd snagn könn (hier snakt'n se dat 'Eck-pladd' - fröher!)
Wenn ik mîne Mudder un mîne Geschwister dräp (selten genoch!), wad natürlich pladd snagt - oder so dörnanner, wenn de Schwôger un Schwägerinnen dorbi sünt.
Läss häb ik uk 'n oln Bekanntn drôbn, mid dän ik noch in'e Schole plattdütsch snakt häb: he wör de Eenzige, dat wör in de irsten Klassn noch ub'n Dörpe.
Dänn güng't jo nô're Reôlschole: dor föhrt'n we mid'n Bus hän. Eers mössn we noch twe'n half Kilomeder Rad föhrn, bid to're Haltestelle: dat wüte ännert.
In'e Reôscholtîd wörn Miniröcke modern! In Physik hört'n we mol 'In the mood' von 'ne Schellack-Pladn. Mid'n Sport- und Französischlehrer wörn we eene Wäke in Frankrîk: dat wör 1970, de Busfohrer hörte jüme 'Let it be' von'e Beatles, un ik wör in eene Deern veknallt! De wör nich ub use Schole. Se ha 'ne Ledderjagn an, un ik ha' mîne Gitarre dorbi. 'Hey Joe' könn' ik späln und'n por eegene Leeder.
Ik wör bi 'ne Slachterfemilie ünnerbrocht: dree Geschwister un 2 Lehrjungs sädn mid an Disch. De Fernseher stün' in Kögn, hüng bôbn in'e Ecke. Willy Brandt in'e Nôrichtn.
Den irstn Obnd wör een Charly to Besuch. Se drünkn Beer un smöktn. Wi besochtn twe Bröe, de öllere ha in'e Rockgruppe Gitarre spält un uk de jüngere könn' späln (im Jugendhus moktn se dat uk). Ik lehrte 'n masse bi em! He wîste mi 'House of the rising sun' in E-moll, un wi improvisierten Blues (he mök mi de Form bewußt).
Se smöktn väl Zigerettn un hörten 'Chicago' (25 or 6 to 4), 'Emerson, Lake & Palmer' usw.
Eenmol woln wi nô'n Rockkonzert: 'Renaissance' schöln dor späln, un eener woll uss afholn - he köm ober nich, wi töftn de halbe Nacht.
|
