|
In nomine Domini amen. Nos frater Fridericus de Alvensleve, domorum militie templi per Alemanniam et Slaviam preceptor humilis, recognoscimus tenore presentium litterarum publice profitentes, quod, cum ordo noster oppressus esset gravi onere debitorum, habito et requisito omnium fratrum et commendatorum, quorum intererat, consensu et voluntate ipsorumque consilio iusto emptionis et venditionis interveniente titulo vendidimus strennuo militi domino Rudolfo Albo necnon domino Ulrico canonico ecclesie Nuenburgensis, Hinrico et Betmanno fratribus dictis de Vrekeleve ipsorumque heredibus pro mille marcis, quinquaginta minus, Stendaliensis argenti curiam nostri ordinis sitam in civitate Halberstat areasque circumiacentes ipsam in vinea et in sacco cum aliis reditibus infra scriptis: in campis Halberstat unum mansum, in Werstede duos mansos cum areis adiacentibus, item molendinum in Widecke cum salicibus, pratis et agris adiacentibus, in Magno Quenstede unum mansum et decimam de v mansis cum uno molendino ibidem, item unum allodium ibidem cum octo areis et tria salicta cum uno prato, item in Parvo Quenstede duos mansos et unam aream, in Ronstede Superiori unum mansum, item in Inferiori Ronstede unum mansum, item in Wiboye ij mansos liberos et ij censuales cum areis adiacentibus, item in Parvo Hersleve duos mansos et unam aream, in Erchstede unum mansum et unam aream, in Strobeke unum mansum et unam aream, item decimam de viginti mansis in Nyendorp inter campos Strobeke et Aspenstede. Quam quidem curiam et bona predicta cum omni iure, utilitate, usufructu, qui ipsis nunc insunt seu in futurum inesse poterunt, in dominum Rodolfum predictum et suos fratres predictos necnon ipsorum heredes cum iusta warandia secundum terre consuetudinem proprietatis titulo transferimus in hiis scriptis, renunciantes nichilominus omni iuri, quod nobis in curia ac bonis predictis actenus competit seu posset competere in futurum. Pecuniam etiam predictam a domino Rudolfo predicto et a suis fratribus antedictis nobis recognoscimus esse persolutam et in usus necessarios nostri ordinis distributam.
|
